Odlar.media xəbər verir ki, Birləşmiş Millətlər Təşkilatının (BMT) iqlim agentliyi “El Nino” hadisəsinin qarşıdakı aylarda daha da güclənərək “çox güclü” kateqoriyasına çatacağını açıqlayıb.
Ümumdünya Meteorologiya Təşkilatının (ÜMT) məlumatına görə, hazırda formalaşmış “El Nino”nun ilin sonuna doğru pik həddə çatacağı və fevrala qədər davam edəcəyi gözlənilir.
Mütəxəssislər bildirirlər ki, okeanlardan atmosferə istiliyin daha yavaş ötürülməsi qlobal temperaturun gələn il də yüksək səviyyədə qalmasına təsir göstərə bilər.
Güclənən “El Nino”nun yağış və temperatur rejimlərinə ciddi təsir göstərəcəyi, bunun isə daşqın, quraqlıq və ekstremal istilik dalğaları riskini artıracağı qeyd olunur.
BMT-nin baş katibi Antonio Quterreş “El Nino”nun böyük miqyaslara çatdığını vurğulayıb. O bildirib ki, dəniz səthinin temperaturu yüksəlməkdə davam edir və dünya ekstremal hava hadisələri baxımından təhlükəli zonadadır.
ÜMT-nin baş katibi Seleste Saulo isə “El Nino”nun dünya üzrə icmalara və iqtisadiyyatlara ciddi zərər vurmaq potensialının olduğunu deyib. Onun sözlərinə görə, quraqlıq və daşqınların yaratdığı fəsadlar artıq müşahidə olunur və hadisənin güclənməsi ilə təsirlərin daha da artacağı gözlənilir.
Saulo fəlakətlərin idarə olunması qurumlarını, eləcə də kənd təsərrüfatı, səhiyyə, enerji və su sektorlarını mümkün risklərə qarşı hazırlıqlı olmağa çağırıb.
“El Nino” təbii iqlim hadisəsidir və birbaşa iqlim dəyişikliyinin nəticəsi hesab edilmir. Lakin alimlərin fikrincə, istiləşən planet fonunda bu hadisə ekstremal hava şəraitinin təsirlərini daha da gücləndirə bilər.
“El Nino” ekvatorial Sakit okeanın mərkəzi və şərq hissəsində dəniz səthinin temperaturunun yüksəlməsi ilə xarakterizə olunur. Bu proses külək, atmosfer təzyiqi və yağıntı rejimlərində qlobal dəyişikliklərə səbəb ola bilər.
Hadisə adətən 2-7 ildən bir baş verir və təxminən 9-12 ay davam edir. “El Nino”nun əksi “La Nina” hesab olunur.
ÜMT hazırkı “El Nino”nun fevrala qədər davam etməsi ehtimalını “son dərəcə yüksək, demək olar ki, 100 faiz” qiymətləndirib. Təşkilat hadisənin intensivliyinin ən yüksək – “çox güclü” səviyyəyə çatacağını gözləyir.
“El Nino”nun təsirləri tropik Sakit okeandan minlərlə kilometr uzaqda yerləşən ərazilərdə də hiss oluna bilər. Belə ki, Amazon hövzəsi, İndoneziya və Avstraliyanın bəzi hissələrində quraqlıq, Hindistanda isə musson yağışlarında fasilələr müşahidə oluna bilər.
ÜMT-nin sentyabr-noyabr ayları üçün proqnozunda isə demək olar ki, bütün quru ərazilərində normadan yüksək temperatur ehtimalının artdığı bildirilir.
Məlumata görə, mərkəzi və şərq ekvatorial Sakit okeanda dəniz səthinin temperaturundakı dəyişiklikləri ölçən göstərici də yüksəlib. May-iyul aylarında temperatur normadan orta hesabla 1,5 dərəcə yüksək olub. İyulun sonu və avqustun ortaları arasında isə həftəlik göstəricilər normadan təxminən 2,2-2,6 dərəcə yüksək qeydə alınıb.
Bəzi ərazilərdə okean səthinin altındakı temperaturun iyul və avqustun əvvəlində normadan orta hesabla 8 dərəcədən çox yüksəldiyi də bildirilib.
Odlar.media