Odlar.media xəbər verir ki, Polşanın Baş Prokurorluğu ölkə Prezidenti Karol Navrotskinin Konstitusiya Məhkəməsinin dörd hakiminin qərar qəbul etməsinə mane olunması ilə bağlı araşdırma çərçivəsində şahid qismində dindirilməsini planlaşdırır.
Prokuror prezidentdən dindirmənin keçirilməsi üçün onun üçün uyğun olan tarix və məkanı bildirməsini istəyib.
Araşdırma aprelin 21-də Konstitusiya Məhkəməsinin iki hakiminin müraciəti əsasında başlanıb. İstintaq çərçivəsində dörd hakimin məhkəmədə fəaliyyət göstərməsinə imkan verilməməsi ilə bağlı hallar araşdırılır.
Prokurorluğun məlumatına görə, indiyədək iş üzrə 40-dan çox şahid dindirilib. Onların arasında Prezident Administrasiyasının və Konstitusiya Məhkəməsinin əməkdaşları da var. Bundan əlavə, araşdırma üçün əhəmiyyət kəsb edən sənədlər götürülüb.
Prokurorluq hesab edir ki, Navrotskinin şahid qismində dindirilməsi hadisənin bütün hallarının müəyyənləşdirilməsi və hüquqi qiymətləndirilməsi baxımından zəruridir.
Beləliklə, Polşada prezident, hökumət və məhkəmə sistemi arasında son aylarda davam edən hüquqi-siyasi qarşıdurma yeni mərhələyə qədəm qoyub.
Navrotskinin nə vaxt və harada dindiriləcəyi hələlik məlum deyil.
Odlar.media