Odlar.media xəbər verir ki, avqustun 27-si saat 10:00-a olan məlumata əsasən, Azərbaycanın əksər rayonlarında hava şəraiti əsasən yağmursuz keçib. Lakin axşam və gecə bəzi dağlıq və dağətəyi rayonlarda qısamüddətli leysan xarakterli yağış yağıb və şimşək çaxıb.
Milli Hidrometeorologiya Xidmətinin məlumatına görə, düşən yağıntının miqdarı Sarıbaşda (Qax) və Gədəbəydə 2 mm, Kəlbəcər, Laçın, Qubadlı, Şuşa, Xankəndi, Mingəçevir, Zaqatala, Goranboy, Şahdağ, Şəki, Oğuz, Şəmkir və Şərurda isə 1 mm-dək olub.
Bəzi ərazilərdə şimal-qərb küləyi əsib. Küləyin maksimal sürəti Culfada 22, Goranboyda 19, Bakı və Abşeron yarımadası, eləcə də Naftalanda 18, Tərtərdə isə 16 m/s-dək güclənib.
Qusar, Göygöl, Xankəndi, Şahbuz və Lerikdə duman müşahidə olunub.
Havanın maksimal temperaturu Bakı və Abşeron yarımadasında 31, Naxçıvan Muxtar Respublikası və Aran rayonlarında 39, dağlıq rayonlarda isə 28 dərəcəyədək isti olub.
Milli Hidrometeorologiya Xidmətinin avqustun 27-si üçün əvvəlcədən yaydığı proqnozda da bəzi dağlıq və dağətəyi rayonlarda fasilələrlə yağış, ayrı-ayrı yerlərdə leysan və şimşək ehtimalı, həmçinin küləyin güclənəcəyi bildirilmişdi.
Odlar.media
