Mətn:
Odlar.media xəbər verir ki, ABŞ dövlət katibi Marko Rubio Vaşinqtonda Meksikanın xarici işlər naziri Roberto Velasko Alvareslə görüşüb.
Görüş zamanı qanunsuz miqrasiyanın qarşısının alınması, sintetik opioid fentanilin tədarükünün dayandırılması, eləcə də xarici terror təşkilatları və narkokartellərə qarşı “qətiyyətli tədbirlərin” görülməsi müzakirə olunub.
Marko Rubio görüşün detalları barədə “X” sosial şəbəkəsində paylaşım edib. ABŞ Dövlət Departamentinin açıqlamasında isə tərəflərin narkokartellərin “silahsızlaşdırılması” istiqamətində səyləri müzakirə etdikləri bildirilib.
Görüş ABŞ-Meksika münasibətlərində təhlükəsizlik, narkotiklərlə mübarizə və miqrasiya məsələlərinin əsas gündəm olaraq qaldığı bir vaxtda keçirilib.