Odlar.media xəbər verir ki, Ukrayna hərbçilərinin Rusiya ilə müharibədə qazandığı döyüş təcrübəsi Qərb ölkələrinə radioelektron mübarizənin müasir müharibələrdə artan əhəmiyyətini yenidən göstərib.
“Business Insider” yazır ki, Soyuq müharibədən sonra Qərb ölkələrinin silahlı qüvvələrində bu sahəyə əvvəlki qədər diqqət yetirilməyib. Lakin Ukraynadakı müharibə radioelektron mübarizə və pilotsuz uçuş aparatlarına qarşı mübarizənin müasir döyüş əməliyyatlarında mühüm rol oynadığını ortaya qoyub.
Nəşrin məlumatına görə, Norveç NATO ərazisində Ukrayna hərbçilərinin döyüş əməliyyatlarına hazırlanmasına yönəlmiş yeni çoxmillətli təlim proqramına rəhbərlik edir. Təlim zamanı Qərb təlimatçıları yalnız öz təcrübələrini bölüşmür, eyni zamanda müharibədə iştirak edən ukraynalı hərbçilərin praktiki təcrübəsindən də yararlanırlar.
Ukrayna hərbçiləri xüsusilə radioelektron mübarizə və pilotsuz uçuş aparatlarına qarşı mübarizə sahələrində NATO ölkələri üçün dəyərli təcrübə təqdim edirlər.
“Legio” əməliyyat qrupunun komandiri, briqada generalı Atle Molde bildirib ki, Ukrayna hərbçilərinin hazırlanması tərəfdaş ölkələrə müharibənin əsas dərslərini öz silahlı qüvvələrində tətbiq etmək imkanı yaradır.
Onun sözlərinə görə, Norveçin bu əməkdaşlıqdan çıxardığı mühüm nəticələrdən biri radioelektron mübarizə imkanlarının yenidən gücləndirilməsinin zəruriliyidir.
General qeyd edib ki, Soyuq müharibə dövründə Qərb və NATO ölkələrinin radioelektron mübarizə sahəsində kifayət qədər böyük potensialı olub. Lakin Sovet İttifaqının dağılmasından və Soyuq müharibənin başa çatmasından sonra diqqətin üsyançılara qarşı mübarizə və digər oxşar əməliyyatlara yönəlməsi nəticəsində bu istiqamət ikinci plana keçib.
Ukraynadakı müharibə isə radioelektron mübarizənin müasir yüksək intensivlikli döyüşlərdə strateji əhəmiyyətini yenidən gündəmə gətirib.