Odlar.media xəbər verir ki, bu gün Birinci Fəxri Xiyabanda Xalq yazıçısı Elçinin vəfatının birinci ildönümü münasibətilə anım mərasimi keçirilib, eyni zamanda onun qəbirüstü abidəsi ictimaiyyətə təqdim olunub.

Tədbirdə dövlət rəsmiləri, Milli Məclisin deputatları, diplomatik korpusun nümayəndələri, elm və mədəniyyət xadimləri, eləcə də mərhum yazıçının ailə üzvləri iştirak ediblər.

Anım mərasimi çərçivəsində Xalq yazıçısının qəbirüstü abidəsinin açılışı olub. Abidənin müəllifi Xalq rəssamı Natiq Əliyevdir.

Mərasimdə çıxış edən mədəniyyət nazirinin müavini Murad Hüseynov bildirib ki, Elçin Azərbaycan ədəbiyyatının inkişafına mühüm töhfələr verib. Onun sözlərinə görə, yazıçının zəngin ədəbi irsi gələcək nəsillər üçün də öz dəyərini qoruyacaq.

Xalq yazıçısı Anar isə çıxışında Elçinin yaradıcılığını Azərbaycan nəsrində yeni istiqamətin formalaşmasına mühüm təsir göstərən hadisə kimi qiymətləndirib və onun xatirəsinin daim yaşayacağını vurğulayıb.

Yazıçının qızı, Milli Məclisin deputatı Günay Əfəndiyeva atasının vəfatından sonra cəmiyyət tərəfindən göstərilən ehtiramın ailələri üçün böyük mənəvi dəstək olduğunu bildirib.

“Atam çox şərəfli ömür yaşayıb. Onun bu gün də sevgi və hörmətlə xatırlanması bizim üçün ən böyük təsəllidir”, – deyə deputat qeyd edib.

Günay Əfəndiyeva, həmçinin, Xalq yazıçısının xatirəsinə göstərilən diqqət və ehtirama görə Prezident İlham Əliyevə və Azərbaycan dövlətinə minnətdarlığını ifadə edib.

Qeyd edək ki, Xalq yazıçısı Elçin 2025-ci il avqustun 3-də vəfat edib və Birinci Fəxri Xiyabanda dəfn olunub.