Səmada görünür arzumun səfi,
Pozma nizamımı, a qara qüvvə.
Təzəcə böyüyüb ümid qanadım,
Üzmə qanadımı, a qara qüvvə.
Dözümüm qılıncdı, səbrim də rəndə,
Hər şeyin həddi var, bil, bunu sən də.
Məni qaralama, izləmə gündə,
Əzmə ürəyimi, a qara qüvvə.
Şeytan qulağına nə deyib sənin?
Mənlə duruşubsan, çoxalıb qəmim.
Çəkmirsən kölgəni yolumdan mənim,
Gəzmə yollarımda, a qara qüvvə.
Dünyaya göz açıb doğulan andan,
Bəxtim buz nəfəsli, həyatım zindan.
Sən nə istəyirsən? Əl çək, ver imkan,
Etmə pisliyini, a qara qüvvə.
Yer üstə yağışı sağan səmadan,
Günəşi gözümdən doğan səmadan,
Məni öz qoynuna alan səmadan,
Bir güman yerim o iltifatını,
Kəsmə, çıx ömrümdən a qara qüvvə.
Müəllif: Fuad Biləsuvarlı
Saat: 06:04
Tarix: 24 iyul
Mənbə: Odlar.media