Elə daşlaşmışam gözüm buludda,
Bulud ağlayacaq bil, əvəzimdə.
O qədər itkilər verdim ki, vallah,
Lal oldum, danışa bilmirəm ki, mən —
Sükut danışacaq bil, əvəzimdə.
Bir susuz səhradı indi ürəyim,
Kölgəsi də yoxdu, çoxdu göynəyim.
Bir qıfıl vurulub dilimə mənim —
Sükut danışacaq bil, əvəzimdə.
Ən rahat son evim torpaqdı, gildi,
O dünya elə də uzaq deyildi.
Mənim sükutum da dodaqdı, dildi —
Sükut danışacaq bil, əvəzimdə.
Körpə balaların gül yuxusuna,
Baxacam onların bol yuxusuna.
Qarışıb gecənin bal yuxusuna —
Sükut danışacaq bil, əvəzimdə.
Bu dünya evindən qovub mərdini,
O da ki, deyəsən aşıb həddini
Nənəm kimi qəlbə salıb dərdini —
Sükut danışacaq bil, əvəzimdə.
Bulud danışacaq hey əvəzimdə.
Arzular, istəklər, kamlar, duyğular —
Ümid danışacaq hey əvəzimdə.
Nə bilim, bilmirəm bir sənətkarın
Əlində hansısa bir gözəl alət —
Tar, ud danışacaq bil, əvəzimdə.
Müəllif: Fuad Biləsuvarlı
20 iyul
Mənbə: Odlar.media