Odlar.media xəbər verir ki, Milli Məclisin deputatı, ədəbiyyatşünas alim Elnarə Akimova 12 İyul – Tovuz döyüşlərinin altıncı ildönümü münasibətilə paylaşım edərək, bu tarixi hadisənin Azərbaycanın müasir tarixində xüsusi yer tutduğunu vurğulayıb. Deputat bildirib ki, Tovuz döyüşləri təkcə sərhəddə baş vermiş hərbi qarşıdurma deyil, həm də xalqın milli iradəsini, dövlətə sədaqətini və Vətən sevgisini bütün dünyaya nümayiş etdirən şanlı qəhrəmanlıq salnaməsidir.
Elnarə Akimova qeyd edib ki, 2020-ci ilin iyulunda Tovuz istiqamətində baş verən döyüşlər Azərbaycan xalqının milli ruhunu daha da gücləndirdi, cəmiyyətin həmrəyliyini möhkəmləndirdi və hər bir vətəndaşda torpaqların azadlığı uğrunda mübarizə əzmini artırdı. Onun sözlərinə görə, həmin günlərdə xalq və dövlət bir yumruq kimi birləşərək ordusunun yanında olduğunu bütün dünyaya nümayiş etdirdi.
Deputat vurğulayıb ki, Tovuz döyüşlərində şəhidlik zirvəsinə ucalan Azərbaycanın Milli Qəhrəmanı general-mayor Polad Həşimov, polkovnik İlqar Mirzəyev, mayor Anar Novruzov, mayor Namiq Əhmədov, gizir Yaşar Babayev, əsgər Elçin Mustafazadə və digər qəhrəman hərbçilər canları bahasına Vətən torpağını qoruyaraq xalqın qürur mənbəyinə çevrildilər. Onların göstərdiyi şücaət Azərbaycan Ordusunun sarsılmaz gücünü, peşəkarlığını və döyüş əzmini bir daha nümayiş etdirdi.
Elnarə Akimovanın fikrincə, Tovuz döyüşləri Azərbaycanın hərb tarixində dönüş nöqtəsi olmaqla yanaşı, 44 günlük Vətən müharibəsində qazanılan möhtəşəm Zəfərin mənəvi, siyasi və psixoloji əsaslarını formalaşdırdı. O bildirib ki, həmin döyüşlər zamanı xalqın nümayiş etdirdiyi birlik, ordunun qazandığı üstünlük və şəhidlərin qəhrəmanlığı ölkədə böyük ruh yüksəkliyi yaratdı, işğal altında olan torpaqların azad ediləcəyinə inamı daha da möhkəmləndirdi.
Deputat qeyd edib ki, Prezident, Müzəffər Ali Baş Komandan İlham Əliyevin qətiyyətli siyasəti, Azərbaycan Ordusunun gücü və xalqın həmrəyliyi nəticəsində cəmi bir neçə ay sonra başlanan Vətən müharibəsində tarixi Zəfər qazanıldı, ərazi bütövlüyü bərpa edildi və şəhidlərin qanı yerdə qalmadı.
Elnarə Akimova bildirib ki, bu gün Tovuz döyüşlərinin qəhrəmanları yalnız ailələrinin deyil, bütün Azərbaycan xalqının fəxridir. Onların xatirəsi daim ehtiramla yad edilir, göstərdikləri igidlik isə gələcək nəsillər üçün vətənpərvərlik məktəbi kimi yaşayacaq.
Deputat paylaşımını bu sözlərlə yekunlaşdırıb:
“12 İyul – Tovuz döyüşləri Azərbaycan xalqının iradəsini, birliyini və Vətən sevgisini bütün dünyaya göstərən şərəf tarixidir. Həmin gün şəhidlik zirvəsinə ucalan Milli Qəhrəman general-mayor Polad Həşimov, polkovnik İlqar Mirzəyev və onların silahdaşları canları bahasına millətin qürurunu oyatdı, xalqı vahid amal ətrafında birləşdirdi və 44 günlük Vətən müharibəsində qazanılan Böyük Zəfərə aparan yolun başlanğıcını yazdı. Bu gün Tovuz şəhidlərini dərin ehtiramla anır, onların əziz xatirəsi qarşısında baş əyirik. Ruhunuz şad olsun, Zəfərimizin bayraqdarları!”
Mənbə: Odlar.media