Odlar.media xəbər verir ki, Moskva vilayətində raket təhlükəsi ilə bağlı əhaliyə rəsmi xəbərdarlıq göndərilib.
APA-nın Moskva bürosunun məlumatına görə, Fövqəladə Halların Xəbərdarlığı üzrə Vahid Dövlət Sistemi tərəfindən sakinlərə göndərilən bildirişdə onlara evdə qalmaları və pəncərələrdən uzaq durmaları tövsiyə olunub. Küçədə və ya avtomobildə olan şəxslərə isə yeraltı keçidlərdə və ya dayanacaqlarda sığınacaq tapmaları məsləhət görülüb.
Xəbərdarlıqda mobil internet xidmətində fasilələrin yarana biləcəyi də qeyd olunub.
Bundan başqa, bildirişdə pilotsuz uçuş aparatlarının (PUA) və hava hücumundan müdafiə sistemlərinin fəaliyyətinin foto və ya video çəkilişinin qadağan olunduğu bildirilib.
Bu arada, Rusiyanın bəzi “Telegram” kanallarında Moskvadakı Kapotnya Neft Emalı Zavodunda yanğın baş verdiyi barədə məlumatlar yayılsa da, Rusiya Fövqəladə Hallar Nazirliyi həmin xəbərləri təkzib edib. Nazirlik zavodun ərazisində hər hansı insidentin qeydə alınmadığını açıqlayıb.
