Odlar.media xəbər verir ki, Ermənistan tərəfinin itkin düşmüş azərbaycanlıların dəfn yerləri barədə məlumatları gizli saxlaması onların taleyinin müəyyənləşdirilməsi istiqamətində aparılan işlərə ciddi maneələr yaradır. Bu barədə Dövlət Təhlükəsizliyi Xidməti (DTX) rəisinin müavini, general-leytenant Şərafət Həsənov Bakıda keçirilən “İtkin düşmüş şəxslər məsələsinin həllində müasir yanaşmalar və əməkdaşlığın gücləndirilməsi” mövzusunda beynəlxalq konfransda çıxışı zamanı bildirib.
Şərafət Həsənov qeyd edib ki, Azərbaycan uzun illərdir itkin düşmüş şəxslərin taleyinin aydınlaşdırılması istiqamətində ardıcıl fəaliyyət həyata keçirir. Onun sözlərinə görə, Ermənistanın işğal siyasətinin nəticələri, o cümlədən ərazilərin geniş şəkildə minalanması, yaşayış məntəqələrinin dağıdılması və ehtimal olunan kütləvi məzarlıqların məhv edilməsi axtarış və identifikasiya prosesini əhəmiyyətli dərəcədə çətinləşdirir.
DTX rəisinin müavini vurğulayıb ki, Ermənistan tərəfinin itkin düşmüş şəxslərin dəfn olunduqları yerlər barədə məlumatları təqdim etməməsi humanitar hüququn prinsiplərinə zidd olmaqla yanaşı, ailələrin uzun illərdir davam edən qeyri-müəyyənlik şəraitində yaşamasına səbəb olur.
“Ermənistanın bir sıra keçmiş yüksək rütbəli hərbçiləri itkin düşmüş azərbaycanlıların dəfn yerləri barədə məlumatlı olduqlarını etiraf etsələr də, həmin məlumatlar indiyədək Azərbaycan tərəfinə təqdim edilməyib”, – deyə Şərafət Həsənov bildirib.
O qeyd edib ki, işğaldan azad edilmiş ərazilərdə aparılan axtarış və qazıntı işləri zamanı müxtəlif kütləvi məzarlıqlar aşkar edilir və bu istiqamətdə müasir ekspertiza üsullarından istifadə olunur. Bununla belə, dəqiq məlumatların olmaması prosesin daha uzun müddət davam etməsinə səbəb olur.
Şərafət Həsənov əlavə edib ki, Azərbaycan humanitar prinsiplərə sadiq qalaraq itkin düşmüş şəxslərin taleyinin müəyyənləşdirilməsi istiqamətində Ermənistanla əməkdaşlığa hazırdır. Onun sözlərinə görə, bu məsələnin həlli təkcə humanitar deyil, həm də regionda davamlı sülhün, qarşılıqlı etimadın və barışığın formalaşdırılması baxımından mühüm əhəmiyyət kəsb edir.
Qeyd edək ki, Bakıda keçirilən beynəlxalq konfransda yerli və xarici ekspertlər, beynəlxalq təşkilatların nümayəndələri, eləcə də aidiyyəti dövlət qurumlarının təmsilçiləri iştirak edirlər. Tədbirdə itkin düşmüş şəxslərin axtarışı, identifikasiyası, müasir texnologiyaların tətbiqi və beynəlxalq əməkdaşlığın genişləndirilməsi məsələləri müzakirə olunur.
