Odlar.media xəbər verir ki, Azərbaycanda nəqliyyat vasitələrinin idarə olunması və sürücülük hüququnun rəsmiləşdirilməsi ilə bağlı qanunvericilikdə sürücülük vəsiqəsinin alınması və ya yenilənməsi üçün yuxarı yaş həddi nəzərdə tutulmayıb.
Bu barədə hüquqşünas Əkrəm Həsənov açıqlamasında bildirib ki, istər sürücülük vəsiqəsinin ilk dəfə əldə edilməsi, istərsə də onun müddətinin uzadılması zamanı vətəndaşların yaşına görə hər hansı məhdudiyyət tətbiq edilmir.
Onun sözlərinə görə, Azərbaycan qanunvericiliyi ahıl və yaşlı şəxslərin yalnız yaş amilinə görə sükan arxasına keçməsini qadağan etmir və onların hüquqlarını məhdudlaşdırmır.
Hüquqşünas vurğulayıb ki, bu məsələdə əsas və həlledici meyar sürücünün sağlamlıq vəziyyətidir. Belə ki, sürücülük vəsiqəsinin müddətini uzatmaq istəyən hər bir vətəndaş müvafiq tibbi müayinədən keçməlidir.
Əgər tibbi komissiya şəxsin görmə qabiliyyətini, ümumi sağlamlıq durumunu və nəqliyyat vasitəsini təhlükəsiz idarə etmək bacarığını qiymətləndirərək müsbət rəy verərsə, həmin şəxs heç bir hüquqi maneə olmadan sürücülük vəsiqəsini yeniləyə bilər.
“Qanunvericilikdə hər hansı bir yaş məhdudiyyəti nəzərdə tutulmayıb. Burada ən əsas və yeganə meyar sürücünün sağlamlıq vəziyyətidir. Vətəndaş ilk növbədə müvafiq tibbi müayinədən keçməlidir. Əgər həkimlərin rəyi müsbət olarsa, yəni sağlamlığı sükan arxasına əyləşməyə imkan verərsə, o zaman şəxs tam qanuni şəkildə sürücülük vəsiqəsini yenidən ala və nəqliyyat vasitəsini idarə edə bilər”, – deyə Əkrəm Həsənov qeyd edib.
Qeyd edək ki, mövcud qanunvericiliyə əsasən, yaşından asılı olmayaraq sağlamlıq vəziyyəti sürücülük üçün uyğun hesab edilən bütün vətəndaşların hərəkət azadlığı və hüquqları qorunur. Sürücülük vəsiqəsinin müddəti başa çatan yaşlı sürücülər sənədlərini yeniləmək üçün ilk növbədə tibbi arayış (Forma 86) almalı, daha sonra isə müvafiq qeydiyyat-imtahan şöbələrinə müraciət etməlidirlər.
