Odlar.media xəbər verir ki, ABŞ administrasiyası Hörmüz boğazından neft tankerlərinin hərəkətinin bərpası üçün yeni tədbirlər paketini müzakirə edir.
“Politico” nəşrinin mənbələrə istinadən yaydığı məlumata görə, Ağ Ev ABŞ və İran arasında davam edən danışıqlar fonunda gəmi sahibləri və sığorta şirkətlərini strateji əhəmiyyət daşıyan Hörmüz boğazından yenidən istifadə etməyə təşviq edəcək mexanizmlər üzərində çalışır.
Müzakirə olunan variantlardan biri ABŞ Hərbi Dəniz Qüvvələrinin müşayiəti ilə boğazdan keçən gəmilər üçün xüsusi ödənişli xidmətin tətbiq edilməsidir. Təklifə əsasən, əlavə rüsum ödəyən gəmilər sürətləndirilmiş və daha təhlükəsiz keçid imkanı əldə edə bilərlər. Bu model qeyri-rəsmi olaraq “VIP keçid” kimi qiymətləndirilir.
Bununla belə, məsələ ilə bağlı hələlik yekun qərarın verilmədiyi bildirilir.
“Kpler” analitik şirkətinin məlumatına görə, hazırda 220 neft tankeri də daxil olmaqla, ümumilikdə 500-ə yaxın gəmi Hörmüz boğazının girişində yerləşən Fars körfəzində təhlükəsiz keçid üçün gözləmə vəziyyətindədir.
Qeyd edək ki, Hörmüz boğazı dünya enerji tədarükü baxımından ən strateji dəniz marşrutlarından biri hesab olunur və burada yaranan hər hansı gərginlik qlobal neft bazarına birbaşa təsir göstərir.
