Odlar.media xəbər verir ki, Milli Məclisin deputatı, ədəbiyyatşünas, alim Elnarə Akimova Milli Gimnastika Arenasında keçirilən Bakı Dövlət Universitetinin Məzun Günündə iştirak etməsi ilə bağlı təəssüratlarını bölüşüb.
Deputat bildirib ki, həmkarları ilə birlikdə iştirak etdiyi tədbir onun üçün yalnız rəsmi mərasim deyil, eyni zamanda gənclik illərinə, tələbəlik xatirələrinə və formalaşma dövrünə qayıdış anlamı daşıyıb. O qeyd edib ki, məzunu olduğu doğma universitetlə hər görüş onda xüsusi duyğular oyadır, keçmişə bağlılığını daha da gücləndirir və həyat yolunda mühüm rol oynamış müəllimlərini ehtiramla xatırlamaq imkanı yaradır.
Elnarə Akimovanın sözlərinə görə, Bakı Dövlət Universiteti təkcə ali təhsil müəssisəsi deyil, Azərbaycan elminin, maarifçiliyinin və milli ziyalılıq ənənələrinin formalaşdığı mühüm mərkəzlərdən biridir. Universitet uzun illər ərzində ölkəyə minlərlə alim, müəllim, dövlət xadimi, hüquqşünas, jurnalist və müxtəlif sahələr üzrə peşəkar kadrlar qazandırıb. Məhz buna görə də bu ali təhsil ocağı burada təhsil almış hər bir insanın həyatında silinməz iz qoyur.
Deputat vurğulayıb ki, universitet illəri insanın dünyagörüşünün formalaşdığı, dostluqların yarandığı, gələcək hədəflərin müəyyənləşdiyi ən dəyərli dövrlərdən biridir. Onun fikrincə, tələbəlik illərində qazanılan biliklər, müəllimlərdən alınan mənəvi dəstək və əldə olunan həyat təcrübəsi sonrakı uğurların təməlini təşkil edir.
“Doğma universitetimlə hər görüş mənim üçün qürur mənbəyidir. Bu görüşlər yaşadığım ən unudulmaz duyğuları yenidən oyadır, öz bilik və intellekt potensialını bizə ötürən dəyərli müəllimlərimizi ehtiramla yad etməyə imkan yaradır. Hər dəfə universitetlə bağlı xatirələri yada salanda anlayıram ki, insanın həyatında bəzi məkanlar var ki, zaman keçsə də onların dəyəri dəyişmir. Bakı Dövlət Universiteti məhz belə ünvanlardan biridir”, – deyə deputat qeyd edib.
Elnarə Akimova bildirib ki, Bakı Dövlət Universiteti məzunları dünyanın müxtəlif ölkələrində fəaliyyət göstərsələr də, onları birləşdirən ortaq dəyərlər və unudulmaz tələbəlik xatirələri var. Onun sözlərinə görə, bu universiteti bitirən hər bir məzun harada yaşamasından və çalışmasından asılı olmayaraq, universitet həyatını qəlbinin və yaddaşının ən dəyərli guşəsində yaşadır.
Deputat hesab edir ki, Məzun Günü kimi tədbirlər universitetlə məzunlar arasında mənəvi bağların daha da möhkəmlənməsinə xidmət edir. Bu cür görüşlər gənc məzunlara gələcək həyatlarında uğur qazanmaq üçün əlavə motivasiya verir, eyni zamanda müxtəlif nəsillərin nümayəndələrini bir araya gətirərək təhsil ənənələrinin davamlılığını təmin edir.
Sonda Elnarə Akimova Bakı Dövlət Universitetinin bütün məzunlarını təbrik edərək onlara gələcək fəaliyyətlərində uğurlar arzulayıb və qeyd edib ki, universitetin qazandırdığı bilik, dəyər və həyat təcrübəsi onların hər zaman ən etibarlı yol yoldaşı olacaq.
Mənbə: Odlar.media