Kommunal ödənişlər bahalaşa bilər: ekspert limitlərin ləğvini real saymır

Odlar.media xəbər verir ki, Azərbaycanda kənd yerlərində əhali üçün qaz və elektrik enerjisi üzrə tətbiq olunan limitlərin ləğvi məsələsi gündəmdədir.
Xüsusilə qış aylarında enerji istehlakının artması kənd təsərrüfatı və fərdi təsərrüfatlarla məşğul olan ailələrin kommunal xərclərinin yüksəlməsinə səbəb olur. Bu baxımdan limitlərin aradan qaldırılmasının əhali üçün hansı maliyyə nəticələrinə səbəb olacağı müzakirə olunur.
Mövzu ilə bağlı  iqtisadçı-ekspert Əkrəm Həsənov bildirib ki, hazırkı iqtisadi şərait qaz və elektrik enerjisi üzrə limitlərin yaxın zamanda ləğv ediləcəyinə əsas vermir.
Ekspertin sözlərinə görə, ölkədə iqtisadi artımın məhdud olması və dövlət büdcəsinin gəlirlərlə bağlı müəyyən çətinliklərlə üzləşməsi kommunal xidmətlər üzrə əlavə güzəştlərin tətbiqini çətinləşdirir.
Əkrəm Həsənov qeyd edib ki, kommunal xidmət göstərən qurumların da öz xərclərini əldə etdikləri gəlirlər hesabına qarşılamaq tələbi qarşısında olduğu nəzərə alınmalıdır.
Onun fikrincə, bu səbəbdən kommunal xidmətlər üzrə ödənişlərin azalması və ya əlavə güzəştlərin tətbiqi yaxın perspektivdə real görünmür. Əksinə, gələcəkdə kommunal xərclərin artması ehtimalı da istisna edilmir.
Ekspert hesab edir ki, limitlərin ləğvi müəyyən dövrlərdə kənd sakinlərinin kommunal ödənişlərinin azalmasına imkan yarada bilər. Lakin mövcud iqtisadi şərtlər belə bir qərarın qəbul olunmasını hazırda real göstərmir.
Odlar.media xəbər verir ki, qaz və elektrik enerjisi üzrə tarif və limitlərlə bağlı hər hansı dəyişiklik yalnız aidiyyəti dövlət qurumlarının rəsmi qərarı əsasında qüvvəyə minə bilər.