Odlar.media xəbər verir ki, Arizona Dövlət Universitetinin xokkey komandasının 21 yaşlı müdafiəçisi Metyu Maçiç ağır vəziyyətdə xəstəxanaya yerləşdirilib. Kanadalı xokkeyçi komandanın məşqi zamanı atletika stadionunda huşunu itirib. İlkin məlumatlara görə, onun vəziyyətinin həddindən artıq isti və günvurma səbəbindən pisləşdiyi bildirilir. Arizonada son günlər yüksək temperatur müşahidə olunur və səhər saatlarında belə havanın temperaturu 32 dərəcəyə yaxınlaşır. Mənbələrin məlumatına görə, Maçiç ürək tutması keçirib və hazırda Feniks şəhərindəki xəstəxanaların birində komadadır. Arizona Dövlət Universitetinin rəsmiləri idmançının xəstəxanaya yerləşdirildiyini təsdiqləsələr də, tibbi məxfiliyi əsas gətirərək onun səhhəti ilə bağlı əlavə məlumat verməyiblər. Qeyd edək ki, Metyu Maçiç 2023-cü ildə keçirilən NHL draftının 6-cı turunda, ümumi olaraq 170-ci seçimlə “Sent-Luis Blyuz” tərəfindən seçilib. Xokkeyçi ötən mövsüm Klarkson Universitetinin komandasında çıxış edib. O, 34 oyunda 15 xal toplayıb – 7 qol vurub və 8 məhsuldar ötürmə edib.
