Odlar.media xəbər verir ki, Milli Məclisin deputatı Elnarə Akimova Azərbaycanın Milli Qəhrəmanı, şəhid general-mayor Polad Həşimovun ailəsi ilə keçirdiyi görüşdən bəhs edən duyğusal paylaşım edib. Deputat görüş zamanı yaşadığı təəssüratları bölüşərək, Polad Həşimovun ailəsində hökm sürən mənəvi dəyərlərin və vətənpərvərlik ruhunun onu dərindən təsirləndirdiyini bildirib.
Elnarə Akimovanın sözlərinə görə, Polad Həşimovun həyat yoldaşı Ofelya Salmanova və övladları – Davud, Aybəniz və Teymurla söhbət etmək onun üçün təkcə bir görüş deyil, həm də qəhrəman bir insanın həyat yoluna ailəsinin xatirələri vasitəsilə yenidən nəzər salmaq imkanı olub.
Deputat qeyd edib ki, ailə üzvlərinin xatirələrində Polad Həşimov yalnız cəsur sərkərdə kimi deyil, həm də qayğıkeş həyat yoldaşı, mehriban ata, yüksək mənəvi keyfiyyətlərə malik insan kimi yaşayır. Onun sözlərinə görə, ailə üzvlərinin danışdığı hər xatirə generalın xarakterini, prinsiplərini və Vətənə bağlılığını daha yaxından tanımağa imkan verib.
Paylaşımında Ofelya Salmanova haqqında da xüsusi fikirlər səsləndirən deputat onu əsl qəhrəman xanımı adlandırıb. Elnarə Akimova bildirib ki, Ofelya xanımın qürurlu, təvazökar, kübar və nəcib davranışı, eyni zamanda ailəsinə olan bağlılığı və övladlarını Polad Həşimovun adına layiq şəkildə böyütməsi böyük hörmət doğurur.
Deputat vurğulayıb ki, Davud, Aybəniz və Teymurun hər birinin baxışlarında, danışığında və xatirələrində Polad Həşimovun izi aydın hiss olunur. Onun sözlərinə görə, general ailəsinin yaddaşında bu gün də canlı, işıqlı və yol göstərən bir şəxsiyyət kimi yaşayır.
Elnarə Akimova Həşimovlar ailəsində hiss etdiyi mənəvi mühitə də toxunaraq qeyd edib ki, bu evdə halallıq, dürüstlük, sadəlik və yüksək mənəvi dəyərlər həyatın əsas prinsiplərinə çevrilib. Deputat bildirib ki, belə bir mənəvi ucalıq insanı həm düşündürür, həm də qürurlandırır.
O, paylaşımında Polad Həşimovun şəhidliyinin artıq təkcə ailəsinin deyil, bütün Azərbaycan xalqının qürur mənbəyinə çevrildiyini vurğulayaraq bildirib ki, xalqın sevgisi və ehtiramı ilə əbədiləşən belə ömürlər hər zaman minnətdarlıq və hörmətlə anılır.
Qeyd edək ki, Azərbaycanın Milli Qəhrəmanı, general-mayor Polad Həşimov 2020-ci ilin iyul ayında Tovuz istiqamətində gedən döyüşlər zamanı ön xətdə vuruşaraq şəhid olub. Onun qəhrəmanlığı Azərbaycan xalqının yaddaşında əbədi iz qoyub və Vətən uğrunda fədakarlığın rəmzlərindən birinə çevrilib.
Paylaşımının sonunda Elnarə Akimova şəhid generalın əziz xatirəsini ehtiramla yad edərək, “Ruhun şad olsun, general!” sözlərini yazıb.
Mənbə: Odlar.media