Odlar.media xəbər verir ki, Birinci Qarabağ müharibəsində itkin düşmüş şəhid Əliyev Möysüm Murad oğlu Füzuli rayonunda torpağa tapşırılıb.
Publika.az-ın Teleqrafa istinadən yaydığı məlumata görə, uzun illər itkin hesab olunan şəhid Möysüm Əliyevin şəxsiyyəti müəyyənləşdirildikdən sonra onun nəşi doğma yurdunda dəfn edilib.
Füzuli rayonunun İkinci Mahmudlu kənd qəbiristanlığında keçirilən dəfn mərasimində şəhidin ailə üzvləri, rayon icra hakimiyyətinin nümayəndələri, hüquq-mühafizə orqanlarının əməkdaşları, hərbçilər, müharibə veteranları və rayon ictimaiyyətinin nümayəndələri iştirak ediblər.
Qeyd edək ki, Möysüm Murad oğlu Əliyev 1973-cü ildə Füzuli rayonunda anadan olub. O, Birinci Qarabağ müharibəsi zamanı Vətən uğrunda gedən döyüşlərə qatılıb və 1994-cü ildə Füzuli rayonunun Aşağı Əbdürrəhmanlı kəndi istiqamətində aparılan döyüşlər zamanı itkin düşüb.
Şəxsiyyəti müəyyən edilən Möysüm Əliyev uzun illər itkin hesab olunduqdan sonra doğma Vətən torpağında dəfn edilən Birinci Qarabağ müharibəsi şəhidlərindən biridir.
