Odlar.media xəbər verir ki, İran Silahlı Qüvvələri Birləşmiş Ərəb Əmirliklərində yerləşən Dubay Beynəlxalq Hava Limanının hərbi hissəsinə zərbə endirdiyini bəyan edib.
Məlumata görə, bu barədə İslam İnqilabı Keşikçiləri Korpusu (SEPAH) özünün rəsmi məlumat kanallarında açıqlama yayıb. Bildirilib ki, hücum yalnız Dubay hava limanının hərbi sektorunu deyil, həmçinin BƏƏ-də yerləşən Əl-Dafra, Əl-Safran və Əl-Mənhad hərbi bazalarını da əhatə edib.
SEPAH daha əvvəl də regiondakı hərbi hədəflərə qarşı əməliyyatlar həyata keçirdiyini açıqlamışdı. İyunun 3-də qurumun Bəhreyndə yerləşən ABŞ Hərbi Dəniz Qüvvələrinin Beşinci Donanmasının qərargahına, eləcə də Yaxın Şərqdəki Amerika hərbi obyektlərindən birinə raket və pilotsuz uçuş aparatları ilə zərbələr endirdiyi bildirilib.
Bundan əvvəl, iyunun 1-də İranın Küveytdə yerləşən Əli Əl-Salem aviabazasına hücum etdiyi açıqlanmışdı. Həmin hadisə nəticəsində dörd ABŞ hərbçisinin və üç mülki əməkdaşın yaralandığı qeyd olunub.
Hadisələrlə bağlı rəsmi qurumların əlavə açıqlamalarının veriləcəyi gözlənilir.
