Azərbaycan.media xəbər verir ki, İran Rusiyadan “Verba” zenit-raket komplektləri və 2,5 min raket daxil olmaqla ümumi dəyəri 500 milyon avro olan silah tədarükü barədə gizli razılaşma əldə edib.
Bu barədə Financial Times məlumat yayıb.
Məlumata görə, saziş İranın hava hücumundan müdafiə sistemlərini bərpa etmək məqsədi daşıyır. Bildirilir ki, bu sistemlər 2025-ci ildə İsraillə baş vermiş müharibə zamanı ciddi zərər görüb. Razılaşma dekabr ayında Moskvada imzalanıb və tədarüklərin 2027–2029-cu illərdə həyata keçirilməsi planlaşdırılır. Mənbələrin iddiasına əsasən, artıq sistemlərin bir hissəsi İran tərəfinə çatdırılmış ola bilər.
Saziş çərçivəsində 500 ədəd “Verba” portativ zenit-raket kompleksi və 2,5 min raket, eləcə də 500 ədəd “Maugli-2” gecəgörmə cihazının tədarükü nəzərdə tutulur. Məlumata görə, bir raketin qiyməti 170 min avro, atıcı qurğunun dəyəri isə 40 min avrodur.
Qeyd olunur ki, razılaşma Rusiyanın dövlət silah ixracatçısı olan Rosoboronexport ilə İran Müdafiə Nazirliyinin Moskva nümayəndəliyi (MODAFL) arasında aparılıb. Dövlət şirkəti və Kremlin nümayəndələri jurnalistlərin sorğularını cavabsız qoyub. Bildirilir ki, sazişin koordinasiyası MODAFL əməkdaşı Ruholla Kətəbi tərəfindən həyata keçirilib.