Odlar.media xəbər verir ki, avqust ayında 2026-cı ilin son tutulma hadisəsi başlayıb. N.Tusi adına Şamaxı Astrofizika Rəsədxanasından bildirilib ki, bu dəfəki hadisə qismən Ay tutulmasıdır.
Qismən Ay tutulması zamanı Yerin kölgəsi Ayı tamamilə örtmür. Bu hadisə Ayın Yer orbitinin kəsişmə nöqtəsinə tam düşmədiyi zaman baş verir.
Mütəxəssislərin sözlərinə görə, Ayın orbit müstəvisi Yerin orbit müstəvisi ilə təxminən 5 dərəcə bucaq təşkil edir. Bu səbəbdən Ay hər ay Yer və Günəş arasındakı xətt üzərindən dəqiq keçmir. Buna görə də tutulmalar hər ay deyil, Ay, Yer və Günəşin uyğun konfiqurasiyada – bir xətt üzərində və ya ona çox yaxın vəziyyətdə yerləşdiyi zaman baş verir. Ay tutulması isə yalnız tam Ay fazasında mümkündür.
Tutulma saat 05:23-də başlayıb və 11:01-də başa çatacaq.
Hadisə Avropa, Afrika, Şimali və Cənubi Amerika, eləcə də Sakit, Atlantik və Hind okeanlarında müşahidə olunmayacaq.
Azərbaycan ərazisində isə tutulmanı müşahidə etmək üçün əlverişli şərait olmayıb. Belə ki, saat 05:35-də artıq mülki alaqaranlıq başlayıb. Ay həmin vaxt üfüqdən yuxarıda olsa da, tutulmanın başlamasından cəmi 12 dəqiqə sonra hava işıqlanıb. Bu müddət isə tutulmanın yarımkölgəli fazasına təsadüf edib.
Yarımkölgəli Ay tutulmasını adi gözlə müşahidə etmək olduqca çətindir. Bu mərhələdə hadisə əsasən Ayın parlaqlığının cüzi azalması kimi hiss olunur.
Qeyd edək ki, 2026-cı ildə bundan əvvəl iki Günəş və bir Ay tutulması olmaqla üç tutulma hadisəsi baş verib. Onların heç biri Azərbaycan ərazisindən müşahidə olunmayıb.
2027-ci ildə isə ümumilikdə beş tutulma hadisəsi baş verəcək. Bunlardan ikisi Günəş, üçü isə Ay tutulması olacaq.
Gələn il 21 fevralda baş verəcək yarımkölgəli Ay tutulması və 2 avqustda baş verəcək Tam Günəş tutulması Azərbaycandan müşahidə edilə biləcək. Bununla belə, 2 avqust tarixli Günəş tutulması zamanı Azərbaycan tam kölgə zolağında yerləşməyəcəyindən hadisə ölkə ərazisindən qismən Günəş tutulması kimi müşahidə olunacaq.
Odlar.media tutulma hadisələri ilə bağlı yenilikləri və astronomik məlumatları oxucularına çatdırmaqda davam edir.
