Mətn:
Belə havalarla keçinmək olmur,
Havadan həzz alıb sevinmək olmur.
Bu nə havalardı, heç bilmək olmur…
Ax, necə tutaq biz göyün nəbzini?
Fəsillər yerini dəyişib nədən?
Baharın üzünü görməyir çəmən.
Bir həzin yağışa möhtacdır Vətən…
Ax, necə tutaq biz göyün nəbzini?
Sərinlik istəyir bu saat ürək,
Ölkəmin üzünə toxunsun külək.
Buludlar, yağışı göndər, sevinək…
Ax, necə tutaq biz göyün nəbzini?
Yorğunluq tökülür yerin canından,
Torpaq da dincəlmək istəyir bu an.
Belə necə dözək biz payızacan?
Ax, necə tutaq biz göyün nəbzini?
Buludlar yağışı səpsin gözündən,
Biz də razı qalaq göyün üzündən.
İstidən can çıxır, gedir özündən…
Ax, necə tutaq biz göyün nəbzini?
Müəllif: Fuad Biləsuvarlı
Mənbə: Odlar.media
21 iyul