Hövsanda məktəb müəllimini öldürməkdə təqsirləndirilən şəxsin barəsində həbs qərarı verilib

Azərbaycan.media xəbər verir ki, Hövsanda məktəb müəllimi olan arvadını qətlə yetirməkdə təqsirləndirilən Vasif Abbasov barəsində həbs qətimkan tədbiri seçilib.
Suraxanı rayon Məhkəməsinin qərarına əsasən, V. Abbasov 3 ay müddətinə həbs olunub. Qərar istintaq orqanının vəsatəti əsasında qəbul edilib.
Qeyd olunur ki, martın 20-də paytaxtın Suraxanı rayonu ərazisində (Hövsan) 1990-cı il təvəllüdlü Pərvanə Abbasova aldığı xəsarətlər nəticəsində ölüb. İlkin araşdırmalar zamanı 1983-cü il təvəllüdlü V. Abbasovun onun qəsdən öldürməsinə əsaslı şübhələr müəyyən edilib.
Faktla bağlı Suraxanı rayon prokurorluğunda Cinayət Məcəlləsinin 120.1-ci maddəsi (qəsdən adam öldürmə) ilə cinayət işi başlanıb. Pərvanə Abbasova Suraxanı rayonu, Hövsan qəsəbəsində yerləşən 118 saylı məktəbin müəllimi olub.