Azərbaycan.media xəbər verir ki, Rusiyanın Krasnodar şəhərində yerləşən ən böyük otellərdən biri və çoxmənzilli yaşayış binalarından biri ötən gecə Ukrayna ordusunun dron hücumuna məruz qalıb.
Rusiya mediasının yaydığı məlumata görə, hücum nəticəsində ciddi maddi ziyan qeydə alınıb. Bildirilir ki, pilotsuz uçuş aparatlarının (PUA) qalıqları fərdi yaşayış evinin divarına və pəncərəsinə, həmçinin otelin dayanacağında olan yeddi avtomobilə zərər vurub.
Bundan əlavə, Krasnodarın Prikubansk rayonunda PUA parçalarının düşməsi nəticəsində çoxmənzilli binanın damı zədələnib, eyvan dağılıb və mənzillərdən birinə ziyan dəyib. Hadisə zamanı qəlpələrin təsiri ilə ümumilikdə təxminən 10 avtomobilə də zərər dəyib.
İlkin məlumatlara əsasən, hücum nəticəsində xəsarət alan olmayıb.