Azərbaycan.media xəbər verir ki, Qubada ölümlə nəticələnən yol-nəqliyyat hadisəsi baş verib.
Daxili İşlər Nazirliyinin Baş Dövlət Yol Polisi İdarəsindən APA-ya verilən məlumata görə, martın 12-də saat 17 radələrində Quba rayonunun Qımılqazma kəndi ərazisində 27 yaşlı Bakı sakini Elçin Yusif oğlu Yusifovun idarə etdiyi kvadrisikl beton maneəyə çırpılıb. Nəticədə sürücü aldığı ağır xəsarətlərdən hadisə yerində vəfat edib. Faktla bağlı araşdırma aparılır.
İdarə bildirir ki, son dövrlər istirahət və turizm məkanlarında geniş istifadə edilən kvadrisikllərin idarə olunması zamanı təhlükəsizlik qaydalarına əməl olunmaması ciddi narahatlıq doğurur. Qeyd olunur ki, bu tip nəqliyyat vasitələrinin sürət həddi və yol şəraiti nəzərə alınmadan idarə olunması həyat və sağlamlıq üçün real təhlükə yaradır və bəzən ölümlə nəticələnən qəzalara səbəb olur.
Baş Dövlət Yol Polisi İdarəsi xatırladır ki, kvadrisikl konstruktiv xüsusiyyətlərinə görə sabitliyi məhdud olan nəqliyyat vasitəsidir və onun məsuliyyətsiz idarəsi yüksək risk daşıyır. Həmçinin, bu növ nəqliyyat vasitələrinin yalnız müvafiq sürücülük hüququ olan şəxslər tərəfindən ümumi yollarda idarə olunması tövsiyə olunur.
İdarə bir daha vurğulayır ki, çətin relyef şəraitində, dağlıq ərazilərdə istifadə olunan kvadrisikllərdə təhlükəsizlik qaydalarına ciddi riayət etmək, sürət həddini və yol şəraitini nəzərə almaq ağır yol-nəqliyyat hadisələrinin qarşısının alınması baxımından mühüm əhəmiyyət kəsb edir.