Azərbaycan.media xəbər verir ki, fevralın 27-də Sumqayıt şəhərində vətəndaşlarla birbaşa ünsiyyətin təmin edilməsi, mövcud problemlərin operativ araşdırılması və həlli məqsədilə növbəti səyyar qəbul-görüş təşkil olunub. Qəbul Sumqayıt şəhər İcra Hakimiyyətinin başçısı Zakir Fərəcov tərəfindən şəhərin 8-ci mikrorayon ərazisində keçirilib.
Görüşdə şəhər İcra Hakimiyyətinin məsul şəxsləri, aidiyyəti idarə və müəssisələrin nümayəndələri və sakinlər iştirak ediblər. Vətəndaşların gündəlik həyatlarını narahat edən sosial-məişət problemləri, abadlıq, infrastruktur, kommunal xidmətlər və digər məsələlər diqqətlə dinlənilib.
Qaldırılan müraciətlərin bir qismi yerindəcə həll olunub, icrası mümkün olmayan məsələlərlə bağlı isə müvafiq araşdırmalar aparılması və qanunvericiliyə uyğun operativ tədbirlərin görülməsi üçün aidiyyəti qurum rəhbərlərinə tapşırıqlar verilib.
Görüş zamanı şəhər rəhbəri Sumqayıtda aparılan genişmiqyaslı abadlıq-quruculuq, yenidənqurma və sosial infrastruktur layihələri barədə məlumat verib və işlərin mərhələli şəkildə davam etdiriləcəyini qeyd edib. Sakinlər isə həyata keçirilən müsbət dəyişiklikləri yüksək qiymətləndirərək, səyyar qəbulların problemlərin yerində və vaxtında həllinə mühüm töhfə verdiyini vurğulayıblar.
Qeyd olunur ki, vətəndaş məmnunluğunu artırmaq, açıq dialoqu təmin etmək və yerli problemləri birbaşa ünsiyyət yolu ilə həll etmək məqsədilə Sumqayıtda səyyar qəbul-görüşlər davamlı olaraq keçirilir.