Azərbaycan.media xəbər verir ki, Azərbaycanın İordaniyadakı səfirliyində Xocalı soyqırımının 34-cü ildönümü ilə əlaqədar anım tədbiri təşkil olunub. Tədbirdə İordaniyada yaşayan Azərbaycan diasporunun nümayəndələri, ictimaiyyət təmsilçiləri və səfirliyin əməkdaşları iştirak ediblər.
AZƏRTAC-ın məlumatına görə, tədbir Xocalı faciəsi qurbanlarının və Ermənistanın Azərbaycana qarşı onilliklər ərzində həyata keçirdiyi təcavüz zamanı həyatını itirmiş bütün şəhidlərin əziz xatirəsinin bir dəqiqəlik sükutla yad edilməsi ilə başlayıb.
Tədbirdə çıxış edən səfir Ş.Abdullayev Xocalı soyqırımını Azərbaycan xalqının tarixində ən qanlı və faciəli səhifələrdən biri kimi qiymətləndirib və bu dəhşətli cinayətin Ermənistanın etnik nifrət və irqi ayrı-seçkilik siyasətinin tərkib hissəsi olduğunu vurğulayıb.
Diaspor nümayəndələri çıxışlarında Xocalı soyqırımının Azərbaycan xalqının yaddaşında silinməz iz buraxdığını, bu həqiqətlərin beynəlxalq ictimaiyyətə çatdırılmasının və gələcək nəsillərə ötürülməsinin vacibliyini qeyd ediblər.
Tədbirin sonunda Xocalı faciəsinə həsr olunmuş sənədli film nümayiş etdirilib və soyqırımı qurbanlarının xatirəsi dərin ehtiramla yad edilib.
Tədbir İordaniyanın “Petra” dövlət informasiya agentliyi, “Jordan Daily” qəzeti, “al-Wakaai.com”, “əl-Məmləkə” telekanalının saytı, “Ammonnews”, “əl-Bələd” və “Nayrouz.com” internet səhifələrində işıqlandırılıb.