Azərbaycan.media xəbər verir ki, fevralın 24-də Heydər Əliyev Fondu, “PASHA Holding” və **“PMD Projects”**in təşkilatçılığı ilə “Azərxalça” ASCnin yaradıcı heyəti və usta toxucularının birgə zəhməti nəticəsində Şuşa məscidi üçün hazırlanmış yeni xalçaların kəsim mərasimi “Azərxalça” ASC-nin Şabran filialında baş tutub.
Mərasimdə Leyla Əliyeva iştirak edib. O, emalatxananın fəaliyyəti ilə tanış olub, toxucularla söhbət edib və xalçalara son ilmələri vurduqdan sonra kəsim mərasiminə qatılıb.
Xalçalar Şuşa məscidinin ikinci mərtəbəsinin interyeri üçün nəzərdə tutulub və milli xalçaçılıq ənənələrinə uyğun, xüsusi dizayn əsasında hazırlanıb. Hər birinin eni 12, uzunluğu 19 metr olan iki xalçanın ümumi uzunluğu 38 metrdir. Məscidin qadınların ibadəti üçün nəzərdə tutulan hissəsində istifadə olunacaq bu xalçaların toxunmasına 2025-ci il yanvarın 21-də başlanıb.
Şabranda toxunan xalçalarda 50-yə yaxın qadın usta iştirak edib və ümumilikdə 50 milyona yaxın ilmə vurulub. Xalçalar Azərbaycan xalçaçılıq sənətinin yüksək peşəkarlığını və zəngin bədii irsini əks etdirir. Tam toxunma prosesini həyata keçirmək üçün xüsusi olaraq yeni və fərqli üslubda iki dəzgah sifariş edilib; dəzgahlar xaricdən dəvət olunmuş mütəxəssis qrupu tərəfindən məhz “Azərxalça” ASC üçün hazırlanıb.
Xatırladaq ki, Şuşa məscidinin birinci mərtəbəsi üçün hazırlanmış, diametri 22,17 metr olan və ümumdünya xalçaçılıq tarixində analoqu olmayan dairəvi əl xalçasının kəsim mərasimi də bu ay Leyla Əliyevanın iştirakı ilə keçirilib. Həmin nadir sənət əsərinin toxunmasında 150 toxucu xanım iştirak edib və xalçaya təxminən 60 milyon ilmə vurulub. Xalçanın dizaynında “Qarabağ” xalça qrupuna aid motivlər və “Xətai” ornamentləri əks olunub.
