Azərbaycan.media xəbər verir ki, Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən ümumi təhsil müəssisələrinə yeni təyin olunmuş direktorlarla görüş təşkil edilib.
İdarədən verilən məlumata görə, tədbirdə BŞTİ-nin müdir müavini Xəyalə Əhmədzadə məktəblərdə səmərəli idarəetmənin qurulması, təhsilin keyfiyyətinin yüksəldilməsi və sağlam mənəvi-psixoloji mühitin formalaşdırılmasının vacibliyini vurğulayıb, müvafiq tövsiyələrini çatdırıb.
İdarənin strukturu ilə bağlı təqdimatla çıxış edən Təhsilin keyfiyyətinə nəzarət sektorunun müdiri Zinyət Əmirova ayrı-ayrı struktur bölmələrinin səlahiyyət çərçivəsi barədə məlumat verib. O, düzgün qurulmuş kommunikasiyanın təhsildə keyfiyyətin təmin olunmasında və səmərəli məktəb mühitinin formalaşdırılmasında mühüm rol oynadığını qeyd edib.
Görüş zamanı şagird nailiyyətlərinin artırılması, məktəbdaxili idarəetmədə şəffaflığın təmin edilməsi, müəllim–şagird–valideyn münasibətlərinin düzgün qurulması və ictimaiyyətlə əlaqələrin səmərəliliyinin yüksəldilməsi kimi məsələlərin əhəmiyyəti diqqətə çatdırılıb.
Bununla yanaşı, direktorların peşəkar inkişafı, idarəetmədə müasir yanaşmaların tətbiqi, məktəblərdə təhlükəsiz və sağlam təhsil mühitinin yaradılması, eləcə də təsərrüfat və təchizat məsələləri ətrafında fikir mübadiləsi aparılıb.
Sonda iştirakçıları maraqlandıran suallar cavablandırılıb, təklif və rəylər dinlənilib.
Qeyd olunub ki, paytaxtdakı ümumi təhsil məktəblərinə yeni təyin olunmuş direktorlar üçün müxtəlif istiqamətlər üzrə təlim-seminarların təşkili də nəzərdə tutulur.