Azərbaycan.mediaxəbər verir ki, Münxen Təhlükəsizlik Konfransı beynəlxalq təhlükəsizlik siyasəti üzrə qərar qəbul edən şəxslərin fikir mübadiləsi apardıqları ən mühüm platformalardan biridir. Hər il dünyanın müxtəlif ölkələrindən yüksəksəviyyəli rəsmilər cari və gələcək təhlükəsizlik çağırışlarını müzakirə etmək üçün bu platformada bir araya gəlirlər.
Bu sözləri Azərbaycan.media.az-a açıqlamasında politoloq Yalçın Hacızadə deyib.
Ekspert bildirib ki, konfrans soyuq müharibə dövründə formalaşıb və bu gün dünya nizamının transformasiya mərhələsində olduğu bir vaxtda xüsusi aktuallıq kəsb edir. Onun sözlərinə görə, geosiyasi qütbləşmənin artdığı, regional münaqişələrin qlobal təsir radiusu qazandığı və enerji-logistika xətlərinin təhlükəsizlik məsələsinin ayrılmaz hissəsinə çevrildiyi indiki şəraitdə Prezident İlham Əliyevin Münxendə iştirakı təkcə diplomatik protokol hadisəsi deyil, Azərbaycanın gələcək təhlükəsizlik müzakirələrində strateji aktor kimi qəbul olunmasının göstəricisidir.
Politoloq qeyd edib ki, Azərbaycanın beynəlxalq təhlükəsizlik sistemində çəkisi üç fundamental dayağa söykənir: enerji amili, coğrafi mövqe və daxili siyasi sabitlik.
Onun sözlərinə görə, Azərbaycan Avropa və Yaxın Şərqin bir sıra ölkələri üçün enerji təhlükəsizliyində mühüm mənbə rolunu oynayır və enerji ixracı yalnız iqtisadi deyil, həm də geosiyasi alət funksiyası daşıyır. Eyni zamanda, Şərq-Qərb və Şimal-Cənub nəqliyyat dəhlizlərinin kəsişməsində yerləşməsi ölkənin tranzit təhlükəsizliyini beynəlxalq gündəliyin mühüm elementinə çevirir. Regional turbulentlik fonunda sabit dövlət idarəçiliyi isə Azərbaycanın etibarlı tərəfdaş imicini möhkəmləndirir.
İkinci Qarabağ müharibəsindən sonra yaranmış yeni geosiyasi reallığın Cənubi Qafqazda güc balansını dəyişdiyini vurğulayan Yalçın Hacızadə bildirib ki, Azərbaycan hərbi mərhələdən siyasi-diplomatik mərhələyə keçidi təmin edərək sülh müqaviləsi təşəbbüsü ilə çıxış edir. Bu yanaşma qarşılıqlı suverenliyin və ərazi bütövlüyünün tanınması, sərhədlərin delimitasiyası və demarkasiyası, regional kommunikasiyaların açılması və iqtisadi inteqrasiyanın təşviqi prinsiplərinə əsaslanır.
Ekspert əlavə edib ki, Münxen Təhlükəsizlik Konfransı mövcud nizamın müzakirə platforması kimi çıxış etsə də, Azərbaycan beynəlxalq siyasi sistemin yeni təşkilatına çevrilməsi nəzərdə tutulan Sülh Şurasının da təsisçilərindən biridir. Onun fikrincə, hər iki platformada iştirakın strateji sinxronizasiyası Azərbaycanın artıq regional münaqişələrin subyekti deyil, sülh təşəbbüslərini təşviq edən fəal aktora çevrildiyini göstərir.
Politoloq vurğulayıb ki, Prezident İlham Əliyevin Münxen Konfransında iştirakı və Azərbaycanın Sülh Şurasında təsisçi kimi yer alması vahid strateji xəttin tərkib hissəsidir. Bu siyasət nəticəsində ölkə yalnız Cənubi Qafqazın deyil, daha geniş məkanın təhlükəsizlik arxitekturasının formalaşmasında rol oynayır və regional gücdən “orta güc” statusuna doğru irəliləyir.