Azərbaycan.media xəbər verir ki, Hindistan bu həftə Vaşinqton şəhərinə göndərilməsi planlaşdırılan ticarət nümayəndə heyətinin səfərini təxirə salıb.
Bu barədə Reuters məlumat yayıb.
Qərarın əsas səbəbi ABŞ Ali Məhkəməsi tərəfindən Prezident Donald Tramp administrasiyasının tətbiq etdiyi tariflərin ləğv edilməsindən sonra yaranmış qeyri-müəyyənlikdir. Məlumatı Hindistanın Ticarət Nazirliyindəki mənbə açıqlayıb.
Bu addım Asiya ölkələri arasında məhkəmə qərarına verilən ilk konkret reaksiyalardan biri kimi qiymətləndirilir. Qərardan sonra Donald Tramp şənbə günü ABŞ-ın bütün ölkələrdən idxalına qanunla icazə verilən maksimum hədd – 15 faiz məbləğində müvəqqəti tarif tətbiq edib.
Məsələnin həssaslığı səbəbindən adının açıqlanmasını istəməyən mənbə bildirib ki, səfərin təxirə salınması iki ölkə rəsmiləri arasında aparılan məsləhətləşmələrdən sonra qərara alınıb. Səfərin yeni tarixi hələ müəyyənləşdirilməyib.
Mənbənin sözlərinə görə, gecikmə əsasən cümə günü çıxarılan məhkəmə qərarından sonra tarif siyasəti ilə bağlı yaranmış qeyri-müəyyənliklə əlaqədardır.
Qeyd edək ki, nümayəndə heyəti bazar günü yola düşməli və müvəqqəti ticarət sazişinin yekunlaşdırılması üzrə danışıqlar aparmalı idi. Hər iki tərəf Vaşinqtonun Hindistanın Rusiyadan neft idxalı ilə əlaqəli bəzi ixrac mallarına tətbiq etdiyi 25 faizlik cəza tariflərinin azaldılması istiqamətində çərçivə razılaşmasına gəlmişdi.
Razılaşmaya əsasən, ABŞ-ın Hindistan mallarına tətbiq etdiyi tariflərin 18 faizə endirilməsi, Hindistanın isə beş il ərzində enerji təchizatı, təyyarə və ehtiyat hissələri, qiymətli metallar və texnologiya məhsulları daxil olmaqla ABŞ-dan 500 milyard dollar dəyərində məhsul alması nəzərdə tutulurdu.