Azərbaycan.media xəbər verir ki, İmaməli Rəhmanın iki həftədir naməlum xəstəlik səbəbilə Çində müalicə aldığı iddia olunur. Məlumatı Eurasia.net yayıb.
Bildirilir ki, məlumat təsdiqlənərsə, bu, səhhəti ilə bağlı problemlər yaşayan Tacikistan liderinin müalicə üçün Rusiya və ya Qərb ölkələri əvəzinə birbaşa Çini seçdiyi ilk hal olacaq. Mənbə bunu Çinin Mərkəzi Asiya regionunda artan təsirinin göstəricisi kimi qiymətləndirir.
Qeyd olunur ki, prezidentin rəsmi saytında yanvarın 28-də yerli hüquq-mühafizə orqanlarının rəhbərləri ilə görüşünə dair foto yerləşdirilib. Növbəti 17 gün ərzində isə saytda cəmi dörd qısa xəbər yayımlanıb və onların heç birində foto və ya video material olmayıb.
Yalnız fevralın 14-də Asiya İnfrastruktur İnvestisiya Bankının rəhbəri ilə görüşə dair foto paylaşılıb. Fevralın 16-da isə Rəhman Qazaxıstanın xarici işlər naziri Yermek Koşerbayev ilə Düşənbədə görüşüb.
Radio Ozodlıq isə yazır ki, İmaməli Rəhman tibbi yardım almaq və istirahət məqsədilə Çinin Haynan adasındadır.
İddialara görə, 73 yaşlı prezident uzun illərdir yüksək qan təzyiqi və ürək çatışmazlığından əziyyət çəkir. Rəsmi qurumlar tərəfindən məsələ ilə bağlı hələlik geniş açıqlama verilməyib.