Azərbaycan.media xəbər verir ki, bu ilin yanvar ayında Azərbaycan Ermənistana 2 milyon 403,6 min ABŞ dolları dəyərində məhsul ixrac edib.
Dövlət Gömrük Komitəsinə istinadən yaydığı məlumata görə, bu göstərici ölkənin ümumi ixracının 0,1 faizini təşkil edib.
Qeyd olunub ki, ötən ay Ermənistandan Azərbaycana ixrac həyata keçirilməyib.
Xatırladaq ki, ötən il dekabrın 18-də Azərbaycandan Ermənistana 1 220 ton Aİ-95 markalı avtomobil yanacağı göndərilib. Daha sonra bu il yanvarın 9-da Ermənistan Azərbaycandan 1 742 ton Aİ-95 markalı benzin və 956 ton dizel, yanvarın 11-də isə 979 ton Aİ-92 markalı avtomobil yanacağı idxal edib.
Məlumata əsasən, bu ilin yanvar ayında Azərbaycan xarici ölkələrlə ümumilikdə 3 milyard 538 milyon ABŞ dolları dəyərində ticarət əməliyyatı aparıb ki, bu da ötən ilin eyni dövrü ilə müqayisədə 30,5 faiz azdır.
Xarici ticarət dövriyyəsinin 2 milyard 236 milyon ABŞ dolları ixracın, 1 milyard 302 milyon ABŞ dolları isə idxalın payına düşüb. Son bir ildə ixrac 26,4 faiz, idxal isə 36,5 faiz azalıb.
Nəticədə, xarici ticarətdə 934 milyon dollarlıq müsbət saldo formalaşıb ki, bu da illik müqayisədə 5,3 faiz azalma deməkdir.