Azərbaycan.media xəbər verir ki, Həcc ziyarətinə getmək istəyənlər üçün sənəd qəbulunun müddəti uzadılıb.
Bu barədə APA-nın sorğusuna cavab olaraq Qafqaz Müsəlmanları İdarəsinin Xarici Əlaqələr şöbəsinin müdiri, Həcc elektron sisteminin rəhbəri Vüsal Cahangiri məlumat verib.
Onun sözlərinə görə, sənəd qəbulunun müddəti mart ayının 7-dək artırılıb:
“Səudiyyə Ərəbistanı Krallığının Həcc və Ümrə Nazirliyindən daxil olan təlimatlara, eləcə də xaricdə və bölgələrdə yaşayan vətəndaşlarımızın çoxsaylı müraciətlərinə əsasən, bu ilki Həcc mövsümü üçün sənəd qəbulunun müddəti tərəfimizdən martın 7-dək uzadılıb. Vətəndaşlarımızdan xahiş edirik ki, gecikməsinlər. Göstərilən tarixdən sonra müddət bir daha uzadılmayacaq.”
Xatırladaq ki, 2026-cı il Həcc mövsümündə bir nəfər üçün ziyarət paketinin qiyməti 6100 ABŞ dolları olaraq müəyyənləşdirilib.
Tələb olunan sənədlər:
-
Ümumvətəndaş pasportu (ən azı 1 il etibarlılıq müddəti olmalıdır);
-
Şəxsiyyət vəsiqəsinin surəti;
-
5×5 sm ölçüdə, ağ fonda çəkilmiş 2 ədəd rəngli fotoşəkil (qadınlar üçün tünd hicabda);
-
Sağlamlıq haqqında arayış.
Qeyd edək ki, bundan əvvəl sənəd qəbulu üçün son tarix 15 fevral 2026-cı il müəyyən edilmişdi.