Azərbaycan.media xəbər verir ki, fevralın 13-dən etibarən Xocavənd rayonunun Qırmızı Bazar qəsəbəsində yerləşən kənd təsərrüfatı təyinatlı torpaqların əkinçilik məqsədilə istifadəyə verilməsi üçün Kənd Təsərrüfatı Nazirliyi tərəfindən Elektron Kənd Təsərrüfatı İnformasiya Sistemi (EKTİS) – eagro.az portalı üzərindən ərizələrin qəbuluna start verilir.
Axar.az-ın məlumatına görə, qeyd olunan qəsəbədə məskunlaşan və orada yaşayan vətəndaşlardan müraciətlərin toplanması prosesi 2026-cı il martın 13-də günün sonuna qədər davam edəcək.
Bildirilib ki, Qırmızı Bazar qəsəbəsi üzrə aqrar təyinatlı torpaq sahələrinin əkin məqsədli istifadəyə təqdim edilməsi Azərbaycan Respublikası Prezidentinin 27 noyabr 2024-cü il tarixli 236 nömrəli Fərmanının 4.1-ci bəndi və Nazirlər Kabinetinin 26 dekabr 2024-cü il tarixli 544 nömrəli qərarı ilə təsdiq edilmiş qaydalara uyğun olaraq həyata keçiriləcək.
Təklif olunan torpaq sahələri minimum 5 hektar olmaqla, əsasən dəmyə (suvarılmayan) əraziləri əhatə edir və kənd ətrafında yerləşən əkin üçün yararlı sahələrdir. Həmin ərazilərdə buğda, arpa, qarğıdalı, yonca, xaşa və müxtəlif ot qarışıqları, eləcə də pomidor, xiyar, badımcan, bibər, kartof, soğan, tərəvəz lobyası, mətbəx çuğunduru, kök və kələm kimi bitkilərin əkilməsi planlaşdırılır. Su təminatı mümkün olan sahələrdə isə qoz, fındıq, şabalıd, armud, gilas, üzüm və bəzi giləmeyvələrin yetişdirilməsi nəzərdə tutulur.
Qırmızı Bazar qəsəbəsinə köçən sakinlər torpaq sahələrindən güzəştli qaydada istifadə etmək üçün EKTİS sistemində qeydiyyatdan keçməli, fermer elektron kabineti yaratmalı və “Müraciətlərim” bölməsindən “torpaq icarəsinə müraciət” – “Qırmızı Bazar” seçimi ilə ərizə formasını doldurmalıdırlar.
Bundan əlavə, faktiki yaşayış ünvanının Qırmızı Bazar qəsəbəsi olduğunu Daxili İşlər Nazirliyinin “e-polis” tətbiqi vasitəsilə qeyd etmək tələb olunur.
Müraciət edən şəxslərlə təlimlərin təşkili, müqavilələrin imzalanması və ərazilərin yerində tanıdılması prosesi 2026-cı ilin aprel ayından başlayacaq. İcarə müqavilələrinin müddəti birillik bitkilər və yonca üçün 2 il, çoxillik əkmələr üçün isə 5 il müəyyən edilib. İstifadənin nəticələrinə uyğun olaraq bu müddətin uzadılması nəzərdə tutulur.