Azərbaycan.media xəbər verir ki, Rusiya prezidentinin xarici ölkələrlə investisiya-iqtisadi əməkdaşlıq üzrə xüsusi nümayəndəsi, Rusiya Birbaşa İnvestisiya Fondunun rəhbəri Kirill Dmitriyev Parisdə ABŞ Prezidenti Donald Trampın xüsusi nümayəndəsi Stiven Uitkoff və ABŞ liderinin kürəkəni, sahibkar Cared Kuşnerlə görüş keçirib.
Bu barədə “Axios” portalı yazıb.
Portalın mənbələrinə istinadla verdiyi xəbərə görə, görüş Uitkoff və Kuşnerin Ukrayna və Avropa ölkələrinin nümayəndələri ilə apardıqları iki günlük danışıqlardan sonra baş tutub.
“Axios”un iddiasına görə, görüş zamanı Ukrayna böhranının mümkün nizamlanması planı müzakirə edilib. Bildirilir ki, Trampın planının demək olar ki, bütün maddələri üzrə Ukrayna ilə razılıq əldə olunub və bundan sonra Ağ ev bu təkliflə bağlı Rusiya rəhbərliyindən aydın mövqe almağı hədəfləyir.