Azərbaycan.media xəbər verir ki, Ukrayna Prezidenti Volodimir Zelenski jurnalistlərlə söhbətində bildirib ki, ölkəsi əvvəlcə Rusiya Federasiyasının mümkün təkrar hücumunun qarşısını almaq üçün NATO üzvlüyü çərçivəsində təhlükəsizlik zəmanətləri əldə etməyi planlaşdırıb.
Zelenskinin sözlərinə görə, bu təşəbbüs ABŞ və bəzi Avropa tərəfdaşları tərəfindən dəstəklənməyib. Buna görə də hazırda Ukrayna ilə ABŞ arasında ikitərəfli təhlükəsizlik zəmanətləri – ABŞ tərəfindən Ukrayna üçün NATO-nun 5-ci maddəsinə bənzər təminatlar, eləcə də Avropadakı tərəfdaşlar, Kanada, Yaponiya və digər ölkələr tərəfindən əlavə zəmanətlər müzakirə olunur.
Prezident vurğulayıb ki, bu zəmanətlər Ukrayna üçün Rusiyanın yeni təcavüzünün qarşısını almaq imkanı yaradır və artıq ölkənin verdiyi bir kompromis hesab olunur.
Daha əvvəl Axios nəşri ABŞ-ın Ukraynaya NATO-nun 5-ci maddəsinə əsaslanan təhlükəsizlik zəmanətləri təklif etdiyini, eyni zamanda Kiyevdən Donetsk və Luqansk vilayətlərindəki nəzarətində olan əraziləri tərk etməyi tələb etdiyini yazmışdı. ABŞ həmçinin Ukraynaya ərazi güzəştlərini nəzərdə tutan sülh razılaşması ilə bağlı referendum keçirməyi təklif edir.
“Biz ukraynalılara elə təhlükəsizlik zəmanətləri vermək istəyirik ki, bir tərəfdən bu, boş vəd olmasın, digər tərəfdən kifayət qədər güclü olsun. Biz bunu səsvermə üçün Konqresə təqdim etməyə hazırıq”, – deyə amerikalı rəsmi bildirib.
