Azərbaycan.media xəbər verir ki, Moskva prospektinin “Şamaxinka” adlanan yol sahəsində hərəkətin səmərəliliyini artırmaq məqsədilə dəyişikliklər aparılacaq. Bu barədə Azərbaycan Yerüstü Nəqliyyat Agentliyi (AYNA) məlumat yayıb.
Məlumata görə, 20 Yanvar küçəsinin Moskva prospekti və Asif Məhərrəmov küçəsi arasındakı hissədə iki yol sahəsi mövcuddur, lakin biri istifadə olunmadığından kəsişmənin buraxıcılıq qabiliyyəti aşağı düşür. İstifadəsiz yol sahəsindəki qanunsuz parklanma hərəkətin fasiləsizliyinə ciddi maneə yaradır.
Həmçinin, hər iki istiqamətdə mövcud geriyədönmə yerlərindən istifadə edən avtomobillər ilə əsas axındakı nəqliyyat vasitələrinin trayektoriyası toqquşur, bu da pik saatlarda sıxlıq və təhlükə riskini artırır. Layihə hazırlanarkən “Rəqəmsal əkiz” üzərindən simulyasiyalar aparılıb.
Yeni layihəyə əsasən:
-
20 Yanvar və Asif Məhərrəmov küçələrinin kəsişməsində nəqliyyat adacıqları təşkil ediləcək;
-
20 Yanvar küçəsinin Moskva prospekti və Asif Məhərrəmov küçəsi arasındakı yol sahəsində birtərəfli hərəkət təmin olunacaq;
-
Qanunsuz parklanma halları aradan qaldırılacaq;
-
4-cü mikrorayondan Moskva prospekti istiqamətində hərəkət etmək istəyən nəqliyyat vasitələri yeni yönləndirilmiş yola daxil ediləcək;
-
Kəsişmələrdə və yaxınlıqdakı geriyədönmə yerlərində hərəkət işıqforlarla tənzimlənəcək;
-
Yol sahəsində dayanacaq məntəqələrinin yerləri optimallaşdırılacaq.
Dəyişikliklər nəticəsində “Şamaxinka” yolunun səmərəliliyi artacaq, sıxlıq azalacaq və sürücülər üçün hərəkət daha təhlükəsiz olacaq.